Carta de Presentación

Galicia foi e é orixe, lugar de tránsito e final de camiños históricos, receptáculo de ideas e de xentes. Aquí comezou a súa andaina a lingua portuguesa, xermolada en forma de galego-portugués na Idade Media, da cal tamén floreceu o idioma galego. Por eso ten sentido que este vello territorio, e a sua cidade máis simbólica, Santiago de Compostela, acolla o I Congreso Internacional de Educación Ambiental dos paises lusófonos.

Galicia xa celebrou con anterioridade eventos destinados a reflexionar e debater sobre a Educación Ambiental e as ameazas de crise socio-ambiental ás que aquela tenta dar resposta, como o Congreso Internacional sobre Estratexias e Prácticas de Educación Ambiental celebrado no ano 1996, ou a Reunión Internacional de Expertos en Educación Ambiental, convocada pola UNESCO e realizada en Santiago de Compostela no ano 2000. Mais o evento que agora nos reune ten un caracter especial. Porque máis aló do denominador común que acolle a todo o movemento da Educación Ambiental, existen esta vez fortes vínculos lingüísticos e culturais que lle dan un matiz especial a este encontro.

A través do intercámbio de experiencias, da aprendizaxe mútua, da cooperación na resolución de problemas ambientais e pedagóxicos, propoñémonos afondar nos sinais de identidade comúns, construír e tramar novas redes que contribúan a consolidar unha comunidade lusófona de educadores e educadoras ambientais, capaz de contribuir, desde a sua propria identidade, á construcción dun mundo ambientalmente sustentabel, socialmente equitativo e culturalmente diverso.

É un camiño cheo de retos e esperanzas no que se pretende que os países e as comunidades lusófonas exploren e compartan vías de resposta educativas á crise socio-ambiental. Trátase, ao fin e ao cabo, de poñer a nosa intelixencia colectiva, o noso capital cultural e os nosos sentimentos ao servizo do inxente labor de restablecer os elos que nos unen ao ambiente natural e a outros seres humanos.

Comité Organizador.